Nuusberigte


  • Die top 10 Akademiese toekennings vir die eerste kwartaal is aangekondig.
     
    Die top presteerders van elke graad is: vlnr: Engeri Fourie (graad 9), Pierre van der Merwe (graad 8), Theo Lotter (graad 12), Emanuel de Beer (graad 11) en Melissa van Veijeren (graad 10)


    HVS Sport
     

    Hoër Volkskool se Winter Sportprogram is al in volle swang. Ons eerste wedstryde was teen Hoërskool Hogenhoudt van Mpumalanga. Ons eerste rugbyspan het hierdie wedstryd 26 - 24 gewen. Drieë is gedruk deur Aubrey Passman, Francois du Plessis, Ceaser Lewis en JC Conradie. Skopwerk is deur Heinrich Cloete gedoen.
    Die eerste netbalspan het 'n baie goeie wedstryd gehad, maar het ongelukkig 18 - 21 verloor.

    Die eerste rugby- en hokkiespanne het ook aan die UHS -Festival deelgeneem tydens die Paasnaweek. Die rugbyspan het bietjie swaar gekry en het verloor teen Cambridge (49 - 5). Heinrich Cloete het die drie gedruk. Hul verloor ook teen Grey College Invitational Team 49 - 5 en Ceaser Lewis kon deurgaan vir 'n drie.
    Die hokkie het bietjie beter gevaar in hul vyf wedstryde. hul wen teen Cambridge 2 - 1, en teen Victoria Girls 2 - 1. Maryke Badenhorst en Lizelle Nel teken elkeen 'n doel aan by albei wedstryde. die span speel gelykop teen Nico Malan en Framesby, met 'n telling van 1 elk in albei wedstryde, en Maryke Badenhorst teken hierdie doele aan.
    HUl verloor ongelukkig teen Stirling 0 - 3.

    Die naweek van 18 April  het Hoër Volkskool meegeding teen Hoërskool Burgersdorp op die rugby- en hokkieveld, asook op die netbalbaan.
     
    By die netbal het die senior spanne bietjie swaar gekry. Die eerste span verloor 26 - 32, tweedes 9 - 12 en die derde span verloor 11 - 24. Die junior spanne het egter beter gevaar. Die 0.16 A span wen 19 - 13, die 0.16 B span wen 5 - 3 en die 0.14A span wen oortuigend 22 - 8. Die rugbyspanne het ook gemengde welslae beleef. Die 0.14 Span wen 28 - 12. punte is aangeteken deur Roche Landman, Jay-Dee Jooste en Andro Burger. Die 0.15 span verloor 7 - 31 en Jayden Persensie teken al die punte aan. die 0.16A span wen 21 - 12. Dimitre Rogers, Cullen August en Lafras van Rooyen het gesorg vir punte op die telbord. Die tweeede span verloor 0 - 24 en die eerste span verloor ook 7 - 17. Keith Hoffman het die drie gedruk en JC Conradie het die skopwerk behartig.

     


  • Twee van Hoër Volkskool se leerlinge het aan die EPMSSA Classic Skiet Kompetisie deelgeneem. Albei het goed gevaar. Albei se beste prestasie was in die 'Air Rifle Spring Loader' Afdeling, waar TJ van Eeden 'n tweede plek verower het en Marais Calonne 'n derde plek.
    Foto: Links - TJ van Eeden en regs - Marais Calonne
    .
     
      
     
     
     

    HVS Swem
     

    Vier van Hoër Volkskool se top swemmers het aan die Vlak 1 en Vlak 2 gala's onderskeidelik deelgeneem. Vir hierdie gala's moet jy 'n kwalifiserende tyd swem om te kan deelneem, wat dit nog 'n groter prestasie maak.

    Lizandri Crewe Brown het deelgeneem aan die Vlak 1 gala in Kaapstad.  Sy het hier baie goed gedoen en altesaam 1 silwer en 5 brons medaljes verower.  Sy is ook opgeneem in die gemengde 13 -16 jaar vryslagaflos waar haar span 'n algehele sewende plek behaal.

    Lucian Laubscher, Lunen Laubscher en Emanuel de Beer het gekwalifiseer vir die Vlak 2 gala wat in Oos-Londen gehou is. Lunen Laubscher het vir drie individuele items gekwalifiseer en vir vyf aflosse 13 jaar en onder. Lucian Laubscher het vir vier individuele items gekwalifseer, asook vir vier aflosse 14 - 18 jaar.
    Emanuel de Beer het vir vier individuele items gekwalifiseer.  Die swemmers het baie goed gevaar en persoonlike tye is goed verbeter.  Hierdie was baie goeie ondervinding vir ons swemmers.

    Foto: lnr:  Lunen Laubscher, Lucian Laubscher, Emanuel de Beer en Lizandri Crewe-Brown



  • Christelike Kamp #Imagine
     

    ‘n Groep van ons leerlinge, saam met Leon en Liesl Fourie, was op ‘n Christelike kamp genaamd #Imagine die laaste naweek van die skoolvakansie. #Imagine is ‘n landswye kamp wat op drie verskillende plekke in Suid Afrika op dieselfde naweek plaasvind. Dit vind onder andere plaas in Kaapstad, Pretoria en die jaar was dit vir die eerste keer in Jeffreysbaai, waar ons leerders ook was. Daar was om en by 1000 tieners en mentors by die Jeffreysbaai-kamp alleen, waar daar by Pretoria en Kaapstad elk 3500 tieners en mentors wat die heel naweek gesing het tot eer van God en moeilike vra moes antwoord soos of hulle ‘fans’ of ‘followers’ is van Jesus. Ek glo nie een van die tieners wat op die kamp gegaan het, het dieselfde terug gekom nie. Hopelik is volgende jaar se HVS-kampeerders nog meer!

    Foto:  Agter:  Chloe Gerber, Mari Coetzer, Gideon Muller, Vincent Callone, Gideon Joubert, Zirk Venter, Marais Callone.  Voor: Celine Kirstein, Tinica Grassman, Karien Els, TJ van Eeden, Annelou van der Mescht, Lynette Ittershagen-Strauss en Marlie van Niekerk. (afwesig: Francisce Crouse)

    ATKV-redenaarskompetisie
     

     Theo Lötter het met die onvoorbereide mondeling afdeling van die ATKV-redenaarskompetisie in Port-Elizabeth deurgedring na die semi-finale rondte. Hierdie semi-finale rondte sal op 15 Mei 2015 op Hoërskool Pearson in Port-Elizabeth plaasvind. Sterkte en voorspoed word hom toegewens vir hierdie belangrike rondte!
     
     
     
     



  • Gedurende die laaste naweek van die April-vakansie het Hoër Volkskool die tweede suksesvolle rugby- en netbalklinieke aangebied. Die netbalkliniek is met behulp van NMMU se afrigtingsspan aangebied met groot name soos Dumisanie Chauke en Zanele Mdodane,met Spar as borg.

    Die kliniek was 'n groot sukses en het afgesluit met 'n mini- toernooi tussen deelnemende spanne. Na afloop van die toernooi het die afrigters 'n beste verdediger, midde-baan speler en doel aangekondig. Lakeesha Koeberg is aangewys as die beste verdediger, wat 'n groot prestasie is, aangesien Lakeesha 'n 0.14-speler is. Abeedha Masimla is aangewys as die beste middebaanspeler en Lara du Plessis as beste doel op die posisie hulpdoel. Die HVS 0.16-span het amok gemaak deur Hoërskool Piketberg se 0.16-span 26 - 8 te wen, en ook Piketberg eerste span 8 - 7 te wen.
     
    Foto - Links na regs:  Lakeesha Koeberg, Lara du Plessis, Abeedha Masimla wat aangewys is as beste spelers van die kliniek
     

                                  
     
    Foto links: Hier demonstreer Dumi Chauke aan Mia Dorfling hoe om goeie verdedigingstegnieke toe te pas.   Regs: Zanele Mdodane is hier in aksie, besig om aanvalstegnieke te demonstreer.


    Die rugby is afgerig deur die Future Kings, ook van Port Elizabeth.  Hoërskool Brandwag, Gill College, Piketberg Hoërskool en Hoër Volkskool het aan die kliniek deelgeneem. 
    Daar is twee dae afrigting aangebied en is ook afgesluit met wedstryde.  HVS verloor teen Hoërskool Brandwag 36 - 3, Dimitre Rogers kon die bal deur die pale skop.  Die 0.16-span van HVS wen Piketberg se 0.16-span 27 - 5. Cullen August druk twee drieë, Lafras van Rooyen druk een en Dimitre Rogers druk ook een en behartig ook die skopwerk suksesvol. Die eerste spanne van HVS en Piketberg het ook kragte gemeet as die afsluitingswedstryd vir die kliniek. Hoër Volkskool wen die wedstryd 30 - 26. Francois du Plessis, Keith Hoffman, Schalk Theron en Aubrey Passman druk elkeen 'n drie en JC Conradie vervyf die drieë suksesvol.  Ons sien uit om hierdie kliniek weer volgende jaar aan te bied.



    Foto:  Jaco van Schalkwyk, voormalige speler van die Kings en die Leeus, verduidelik hier aan die span 'n beweging. 
     

    Foto:   Hier leer die manne om lynstane te doen onder leiding van Grens-afrigter, Rico van Wyk.
     

  • Mnr en Mej Volkskool 2015
    31 Maart was weer 'n groot hoogtepunt op die skool se kalender. Elke twee jaar bied Hoër Volkskool Mnr en Mej. Volkskool aan. Hierdie jaar het vir geen ander jaar teruggestaan nie.

    Die tema vir 2015 was Afrikaans: van Toeka tot Nou. Alles het getuig van goeie smaak. Van die dekor wat eenvoudig dog stylvol was, tot die kos wat eg Afrikaanse disse was. Van kerrie en rys met pampoenkoekies tot stroopsoet koeksisters, roompoffertjies en fudge. Gerhard Olivier, 'n grad 9 leerling van Grey Port Elizabeth, en Marelize Marx het die gehoor tussen verskillende afdelings vermaak met sang en Klavierspel.

    Die vier beoordelaars het 'n baie swaar taak op hande gehad. Alrie Velleman (Die SARIE Inspirasie-voorbladgesig van die Jaar 2011), Andorette Wolfaardt, Tinkie Naudè en Werner Swart, het hul wel goed van hul taak gekwyt.

    Die deelnemers is in 8 verskillende kategorieë beoordeel. Die aand het afgeskop waar die finaliste die gehoor terug geneem het in tyd en die Volkspele foutloos vertoon het. Tant Hessie se witperd was verseker nie sleg nie!

    Daarna moes elke finalis hom/haarself voorstel en 'n eg Afrikaanse woord verduidelik. Baie het verbaas met hul inisiatief en het die gehoor omtrent aan flarde gehad. Daarna het hul grepe uit Orkney Snork Nie, Vetkoekpaleis, Molly en Wors, Egoli en 7e laan opgevoer. Almal was in vervoering oor Altie en Paula se innige soen en wens Danie Odendaal kon sien hoe hulle dit eintlik moet doen.

    Die meisie-finaliste het hul danspassies gewys, wat gevolg is deur die seuns. Die groot verrassingselement het ingekom toe die drie pikkewyne vir die seuns kom wys het wie hul pikkewyne regtig is.

    Die finaliste is in paartjies gedeel en elke paartjie moes 'n sekere era uitbeeld. Daar was van die 50's tot die 90's gewys. Party paartjies het baie moeite gedoen en van die mense in die gehoor kon met heimweë terugdink aan hul jongdae.

    Die hoogtepunt van so 'n kompetisie is natuurlik die aanddrag. Menigte meisies het manne se asems weggeslaan en die seuns het geensins teruggestaan nie.
    Pryse vir ander kategorieë is aangekondig:
    Die seuns wat die meeste borggeld ingesamel het, was Anton Weitz en die meisie was Jani Lombard.
    Mnr Glimlag is Lucian Laubscher en Mej Glimlag is Elbe van der Merwe.
    Beste danser: Zirk Venter en beste danseres: Melissa van der Nest.
    Mej Bene: Anschen Coetzer en Die gentleman Adrian van Niekerk.
    Mnr Persoonlikheid: Theo Lötter en Mej Persoonlikheid: Doneve Noni.
    Daarna is die top 5 aangekondig waarna elkeen van hulle weer 'n vraag moes beantwoord.

    Hierna is die wenners aangekondig:
    2e Prins: Zirk Venter, 2e Prinses: Melissa van der Nest
    1e Prins: Lucian Laubscher, 1 Prinses: Doneve Noni
    Mnr Volkskool 2015: Theo Lötter
    Mej. Volkskool 2015: Elbè van der Merwe.

    Sonder Delise Botha, Sumeri Botha en Christelle Nel sou hierdie aand verseker nie die sukses gewees het wat dit was nie. Namens Hoër Volkskool wil ons net aan julle elkeen baie dankie sê vir jul bydrae..

    Foto: Vlnr: Zirk Venter, Lucian Laubscher, Theo Lötter, Elbè van der Merwe, Doneve Noni en Melissa van der Nest
     

  • Linda Lötter, Stephan Lategan, Juanita Lategan, Lizelle Nel en Theo Lötter is opgeneem in die OP-span om gedudende 3 - 12 April deel te neem aan die Suid-Afrikaanse Kampioenskappe vir Uitvoerende Kunste in Rustenburg. Die uitdaging lê vir hierdie leerders daarin dat hulle slegs 90 sekondes op die verhoog het om hulle merk te maak. Dit is 'n baie kort tydjie om 'n BAIE groot indruk op die beoordelaars te maak.

    Hierdie leerders het Saterdagaand, 28 Maart, in Port-Elizabeth tydens die OP-span se Toekenningsaand opgetree. Hier het elkeen een van die style waarin hul gaan deelneem, opgevoer en ook hul OP-kleure ontvang.

    Linda Lötter het in 2012 vir die eerste keer aan die Suid-Afrikaanse Kampioenskappe vir Uitvoerende Kunste deelgeneem. Sy het 1 goue en 1 silwer medalje behaal vir sang. In 2013 was sy weer in die OP-span en behaal tydens haar deelname in Rustenburg 4 goue, 1 silwer en 2 brons medaljes. Sy was in beide 2012 en 2013 verkies tot die S.A span. Vanjaar neem sy deel in die volgende afdelings: Vokaal (5 style), Dans (2 style) en Modelwerk (5 style). Sy gaan in altesaam 12 style meeding.

    Lizelle Nel word in 2013 opgeneem in die OP-span en behaal tydens haar deelname in Rustenburg 'n brons medalje. Sy gaan vanjaar in die afdelings Vokaal (7style) en Modelwerk (4 style) deelneem.

    Theo Lötter was ook in 2013 opgeneem in die OP-span en behaal 1 goue en 2 silwer medaljes tydens sy deelname in Rustenburg. Hy was ook verkies tot die S.A. span. Vanjaar gaan Theo deelneem in die Drama afdeling (4 style).

    Vanjaar gaan Stephan en Juanita LAtegan vir die eerste keer in Rustenburg deelneem. Stephan sal altesaam in 10 style deelneem (Vokaal: Solo: 6 style en Duet 4 Style) en Juanita in 11 style (Vokaal: Solo: 7 style en duet 4 style).

    Foto: vlnr:  Stephan Lategan, Lizelle Nel, Theo Lötter, Linda Lötter en Juanita Lategan


Skoollied

O Spandaukop jou fierheid, Verwasen voor die gloed, Van Graaff-Reinet se volksiel en Afrikanermoed
 Laat wêreldstad maar wemel, Laat see maar aanhou spoel, Hoër Volkskool staan hier rotsvas, Almal streef en werk en woel.

HVS Pilare

Die volgende fase van die pilare is nou weer aan die gang en pilare is te koop teen R4000 elk. Pilare is beskikbaar vir families, gesinne en klasgroepe. Hierdie tweede fase bestaan uit 15 pilare en is vanaf die "seunskant" se hek tot by die begin van die tennisbane.  Sodra hierdie fase afgehandel is word die volgende fase aangepak. Die derde fase sal wees vanaf die hoek van Somerset- en Plasketstraat tot by die koshuis.
Skakel Paula van der Mescht by 049 8910852 of finansies@hvsgrt.org.za vir enige navrae.
 

   

Nuttige Skakels

Registreer by

Omsendbrief
Prospektus
Opdateer Oudskoliere Kontakbesonderhede
Interskole uitslae

Oudskoliere Nuusbrief Vol. 6


 

Hoër Volkskool Familie

Hoër Volkskool Gr8-Gr12

Mnr van Rooyen, Skoolhoof
hoof@hvsgrt.org.za

 

Oudskolierebond/ Volksies

Hendrik Wolfaardt  
hendrik@osfontein.co.za

      

Laer Volkskool Gr1-Gr7

Mnr Deon Joubert, Skoolhoof
hoof@karoovolksie.co.za

Weppie Preppie (3jr - GrR)

Karen van Wyk - Tel: 049-8922643

 

Hoër Volkskool Beheerliggaam

Skoolhoof:  Mnr. Hennie van Rooyen
Voorsitter:  Mnr. Roelie Roodt
Finansies:  Paula v.d. Mescht
Ondervoorsitter:  Mnr. Casper Lötter
Sport:  Mnr. Jack Laubscher
Bemarking:  Mev. Diane Bertram en Mnr. Geoff Crewe-Brown
Koshuis:  Mev. Christelle Nel en Mnr. Francois v.d. Merwe
Personeel:  Mnr. Neil Schreuder en Mnr. Theo Dörfling
Terrein:  Mnr. Louis v.d. Mescht

   

Nuttige Skakels

Registreer by

Omsendbrief
Prospektus
Opdateer Oudskoliere Kontakbesonderhede
Interskole uitslae

Oudskoliere Nuusbrief Vol. 6