Hoër Volkskool: ‘n ware Bastion van Christelike Afrikaanse onderrig in die Karoo. Ons skool is ook ‘n lig van hoop in die moeilike en uitdagende tye waarin ons leef.
Gelukkig is die mens wat weet hoe nodig hulle GOD het. En vandaar ons tema vir ons opedag. Die Groot geheim is om op te kyk!
Voornemende leerders en ouers het die geleentheid benut om te sien wat Hoër Volkskool bied. Hulle kon demonstrasies bywoon, Huis Cronjé besoek, ons sportafrigters ontmoet en die vordering van die astro sien.
Volkskool is trots op ons sportafrigters:
Jaco van Schalkwyk is Direkteur van Rugby en ook ons koshuisvader by Huis Cronjé. Jaco was‘n professionele rugbyspeler, by onder andere die Leeus en Cheetahs en het SA 7’s en Super rugby vir die Lions en Cheetahs gespeel. Jaco het reeds in die 5 jaar by Volkskool menigte suksesse gehad, waarvan die grootste waarskynlik Jan-Hendrik Gouws wat in 2021 as agsteman vir die SA o.18-span gekies is.
Janro Malan is Direkteur van Hokkie en was self ‘n provinsiale hokkiespeler. Hy trap reeds diep spore met sy professionele afrigting.
Minnette Potgieter, ook ‘n oudskolier, rig ons skool se eerste tennisspanne af. Sy is self ‘n kranige tennisspeler en het al op skool provinsiaal tennis gespeel en het vroeg in haar lewe reeds vir HVS se eerstespan gespeel. Sy het OP verteenwoordig van o.12 tot o.18. Sy was vir dubbels nr 1 in die Oostelike Provinsie en altyd onder die top 3 vir enkelspel. Sy het na skool met ‘n tennisbeurs in Amerika gaan studeer en is al sedert 2015 betrokke by HVS-tennis.
JP Seyffert is die swemafrigter by die Destiny Swimming Academy. Dit is ‘n SSA geregistreerde swemklub wat tans Hoër Volkskool se binnenshuise swembadfasiliteit gebruik. Vanjaar sal swemmers gedurende die wintermaande met swemafrigting kan voortgaan.
Me. Esténe Coetzee het op skool provinsiale netbal gespeel en was die afrigter van die Noord-Kaap se o.15-span vir die SA-skole netbaltoernooi. Sy rig vanaf 2023 die o.19 netbalspan by HVS af.
Mnr Beyers Cronjé rig boogskiet af. Hy is self ‘n kranige skut wat aan nasionale kompetisies deelgeneem het. Hy was ook lid van die Oostelike Provinsie span wat aan interprovinsiale kompetisies deelgeneem het. Hy is nie net opgelei om skuts te leer skiet nie, maar ook om boogskut-afrigters op te lei.
Ons is: TROTS VOLKSKOOL
“Ons groot geheim is om op te kyk”
Graad 7 leerders: Met julle laerskooldae wat al minder word, is die keuse vir ‘n hoërskool ‘n baie belangrike keuse.
As die eerste hoërskool in Kaapland met Afrikaans as sy enigste voertaal, beklee die Hoër Volkskool ‘n besondere plek in die geskiedenis van Kaapland se onderwys en deur die jare het hy steeds as ‘n baanbreker sy plek op die terrein van die Afrikaanse kultuur konsekwent gehandhaaf.
AKADEMIE
Die skool se toegewyde onderwysers met ondervinding en die nodige kwalifikasies lê die grondslag van die skool se akademie.
KULTUUR
Landsdiens, CSV, Debat asook verskeie skaakspanne, verskeidenheidskonserte en vele meer word jaarliks aangebied
SPORT
Hoër Volkskool het ‘n baie trotse sportgeskiedenis en tradisie. Sy sportspanne was nog altyd ‘n groot krag in die Karoo.
HUIS CRONJE
Een van die belangrikste boustene van ‘n goeie skool, is ‘n goeie koshuis. By Hoër Volkskool beskik hulle oor daardie kwaliteit met die pragtige koshuis waaroor hul beskik – Huis Cronje. Hier probeer hulle vir elke plaaskind of kind van omliggende dorpe dit so huislik as moontlik maak. Alhoewel daar streng dissipline toegepas word, is daar ook tyd vir pret en plesier soos net koshuiskinders dit kan beleef. Die koshuis is oop vir weeklikse verblyf (Maandag tot Vrydag). Reëlings kan getref word oor naweke vir kinders wat wil inbly vir sport op ‘n Vrydagaand. Waar daar genoeg belangstelling in ‘n streek is, word die kinders Vrydae met skoolbussies na hul tuisdorpe of naaste dorp vervoer.
Word deel van die Volkskool familie!