Interskole

Selfs in die tyd toe Graaff-Reinet se sportaktiwiteite hul bloeitydperk beleef het, met verskeie rugby-, krieket-, tennis- en ander sportklubs, was Interskole steeds die hoogtepunt op die dorp se sport- én sosiale kalender. Geen ander geleentheid het die pawiljoene by die Botaniese Sportveld so vol ondersteuners gekry nie.

Ná die stigting van Hoër Volkskool in 1922 en Union High School in 1921 het daar ‘n gesonde “kwaaivriendskap” tussen leerders, ouers en onderwysers van die twee skole ontstaan. Ten spyte van hierdie mededinging het die skole besluit om jaarliks teen mekaar mee te ding, en die eerste sportkragmetings het kort ná hul stigting plaasgevind. Hoewel Volkskool en Union nie die oudste skole in die voormalige Kaapland is nie, is die jaarlikse Interskole tussen hulle een van die oudste en mees gevestigde skooltradisies in Suid-Afrika.

Van 1928 tot 1969 is daar twee Interskole-byeenkomste per jaar aangebied. Soos die rekords toon, het die uitslae dikwels tussen die twee kragmetings gewissel. Volgens baie oudskoliere is daar vanaf 1969 besluit om slegs een Interskole per jaar aan te bied, aangesien die emosies en opwinding rondom die geleentheid eenvoudig te groot was om twee keer per jaar te beleef.

Vandag is die verhouding tussen Volkskool en Union uitstekend. Daar bestaan ‘n sterk band van wedersydse respek en samewerking, maar sodra die eerste fluitjie blaas, maak daardie vriendskap plek vir intense mededinging. Op die veld word met oorgawe meegeding, maar altyd binne die gees van ware sportmanskap.

Interskole is egter veel meer as net sport. Dit is ‘n geleentheid waar oudskoliere van regoor die land terugkeer na hul alma mater, reünies hou, herinneringe herleef en weer deel word van die gees wat hierdie naweek so besonders maak. Vir leerders, ouers en ondersteuners is dit ‘n viering van trots, tradisie en gemeenskap – ‘n erfenis wat van geslag tot geslag voortleef.

Die Karoo roep ons huis toe. En jaar ná jaar antwoord Volksies daardie roep.